بەهۆی نیگەرانییەکانەوە نرخی نەوتی خاو دابەزی

ئەمڕۆ دوشەممە نرخی نەوتی خاوی برێنت بەڕێژەی 49 سەنت کە دەکاتە 0.6% دابەزیوە و هەر بەرمیلێک بە 77 دۆلار و 98 سەنت مامەڵەی پێوە دەکرێت، هەر بەرمیلێک نەوتی خاوی ڕۆژئاوای تەکساس بە ڕێژەی 52 سەنت کە دەکاتە 0.7% دابەزی و گەیشتە 73 دۆلار و 33 سەنت.

ئەم دو جۆرەی نەوت لە هەفتەی ڕابردودا زیاتر لە 4% بەرزبونەوە و گەیشتنە بەرزترین ئاست

ئەم دو جۆرەی نەوت لە هەفتەی ڕابردودا زیاتر لە 4% بەرزبونەوە و گەیشتنە بەرزترین ئاست لە مانگی ئایارەوە و بۆ دوەم هەفتەی لەسەریەک بەرزبونەوەی تۆمارکرد، دوای ئەوەی سعودیە و ڕوسیا کە دو گەورەترین هەناردەکاری نەوتی جیهانن، بەڵێنیاندا لە مانگی ئابدا دابینکردنی نەوت کەمبکەنەوە.

سعودیە بەڵێنیداوە کەمکردنەوەی بەرهەمهێنانی تاکلایەنە بە بڕی یەک ملیۆن بەرمیل لە ڕۆژێکدا تا مانگی ئاب درێژ بکاتەوە، هاوکات ڕوسیا هەناردەی نەوتی خاو بە ڕێژەی 500 هەزار بەرمیل لە ڕۆژێکدا کەمدەکاتەوە.

سەرچاوەیەکی حکومی بە ئاژانسی ڕۆیتەرزی ڕاگەیاندوە، ڕوسیا بۆ بەرهەمهێنانی سوتەمەنی زیاتر کەڵک وەردەگرێت بۆ دابینکردنی خواستی ناوخۆیی.